فەیسەڵ عیساوی سەرۆكی كوتلەی دادپەروەریی و چاكەكاریی دەڵێت، پرۆسەی سیاسی لە عێراق لە مەترسیدایە و بەرەو كۆتاییەكی نادیار دەچین، ئەگەر داواكاریەكانی هاوڵاتیان لەبەرچاو نەگیردرێن.
فەیسەڵ عیساوی لە لێدوانێكی رۆژنامەوانیدا باسی لەوەكردوە، پاشەكشە لە مافی لێپرسینەوە و لەدەستدانی مافێكی پەرلەمانی گرنگە، هەروەها پاشەكشە لە پرۆسە سیاسی لە عێراق و زۆر لاوازی دەكات، هەموو ئەوەش تارمایی بەسەر بڕوابونی هاوڵاتیان بە پرۆسەی سیاسی دروست دەكات كە خۆی لە بنەڕەتدا بڕوایەكی زۆر لاوازە.
رونیشیكردووەتەوە، پرۆسەی سیاسی لەدەستچووە و بڕوای جەماوەر بەو پرۆسەیە ناگاتە 10% و هەڵبژاردنەكان هەمان عەشایەر و تاییفە و حزبن و رێژەی بەشداریكردن تێیاندا ناگاتە 50%، پرۆسەی سیاسی لە مەترسیدایە ئەگەر لە رێگەی رێوشوێنی راستەقینەوە بەهێز نەكرێت.
سەبارەت بەو رێوشوێنانەش عیساوی باسی لەوەكردووە، دەبێت لە پەرلەمانەوە دەستپێ بكرێت و بانگهێشت و لێپرسینەوەی پەرلەمانی بەشێوەیەكی ئاشكرا و پیشەیی چالاك بكرێت، هەروەها راگەیاندنی وتاری نیشمانی و وازهێنان لە دڵسۆزی بۆ لایەنی دەرەكی، كە ئەوەش بە ئاشكرا ئەنجامەكەی خزمەتكردنە بە گەلی عێراق.
