وتەبێژی وەزارەتی دەرەوەی ئێران دەڵێت، ئەوەی راستەوخۆ و ناڕاستەوخۆ دەستی لە كوشتنی قاسم سولەیمانی فەرماندەی پێشووی فەیلەقی قودسدا هەبووبێت سزا دەدرێت.
سەعید خەتیب زادە وتەبێژی وەزارەتی دەرەوەی ئێران لە كۆنفرانسێكی رۆژنامەوانیدا سەبارەت بە راپۆرتەكەی یاهو نیوز لە بارەی كوژرانی قاسم سولەیمانی كە تیایدا باس لە رۆڵی چەند ئەفسەرێكی كوردیش كرابوو، رایگەیاند، هیچ یەك لەو راپۆرتانە شاراوە نین لە لایان و لە راستی و دروستی ناوەرۆكەكەیان دەكۆڵنەوە.
وتیشی، ئەو كەسانەی راستەوخۆ و ناڕاستەوخۆ بەشداریان لە كوشتنی سولەیمانیدا كردووە و لە هەر وڵاتێك بن بە دڵنیاییەوە بەرپرسیارێتی سزایی و یاسایی دەكەوێتە ئەستۆ و لە رێگەی تایبەتی خۆیەوە سزا دەدرێت.
ماڵپەڕی یاهو نیوزی ئەمریكی لە راپۆرتێكدا وردەكاری كوژرانی قاسم سولەیمانی بڵاوكردەوە و تیایدا باسی لەوەكردبوو، چەند ئەفسەرێكی سەر بە دژەتیرۆری هەرێمی كوردستان بەشداریان لە جێبەجێكردنی ئەو پلانەدا كردووە.
لەبەرامبەردا هەر دوو هێزی دژە تیرۆری هەرێم كە سەر بە پارتی و یەكێتین رەتیانكردەوە رۆڵیان لە كردنە ئامانجی فەرماندەی پێشووی فەیلەقی قودسدا هەبووبێت.
