بەرپرسێكی سەربازی ئەمریكا دەڵێت، ئەو كەشتیەی بە بڕێكی زۆر چەك و تەقەمەنیەوە لە دەریای عەرەب دەستی بەسەردا گیرابوو، لە ئێرانەوە بۆ حوسیەكانی یەمەن رەوانەكرابوو.
ئاژانسی ئەسۆشیتدپرێس لە زاری بەرپرسێكی وەزارەتی بەرگریی ئەمریكاوە بڵاویكردەوە، ئەو كەشتیە پڕ لە چەكەی لە دەریای عەرەبی دەستیان بەسەردا گرتبوو، لە ئێرانەوە رەوانەكراون.
باسی لەوەشكرد، سەرباری بڕیارەكانی نەتەوەیەكگرتوەكان بۆ قەدەغەكردنی رەوانەی چەك بۆ یەمەن، بەڵام ئێران بەردەوامە لە ناردنی هاوكاری سەربازی بۆ حوسیەكان.
بەپێی هەواڵێكی پێشووتری رۆیتەرز رۆژی شەممە یەكەی پێنجەمی هێزی دەریاوانی ئەمریكا لە چوارچێوەی ئۆپراسیۆنێكدا لە بەشی باكوری دەریای عەرەب دەستی بەسەر كەشتیەكی پڕ لە چەكدا گرتبوو، كە بڕێكی زۆر موشەكی دژە تانك، ئار پی چی و چەكی مامناوەند و سوكی تێدابووە.
