راوێژكاری ئاسایشی نیشتمانی ئەمریكا نیگەرانی خۆی لە رووداوەكانی قودسی رۆژهەڵات و هەوڵەكانی ئیسرائیل بۆ دەركردنی فەلەستینیەكان لە ماڵەكانیان لە گەڕەكی شێخ جەڕاحی شارەكە دەربڕی.
جەیك سالیڤان راوێژكاری ئاسایشی نیشتمانی ئەمریكا لە پەیوەندیەكی تەلەفونیدا لەگەڵ مائیر بن شبات راوێژكاری ئاسایشی نیشتمانی ئیسرائیل باسی لە نیگەرانیەكانی واشنتۆن كرد لە بارەی توندوتیژییەكانی قودسی رۆژهەڵات و ئەگەری دەستبەسەرداگرتنی مڵك و ماڵی فەلەستینیەكانی گەڕەكی شێخ جەڕاح.
هاوكات لەگەڵ ئەو پەیوەندیە تەلەفونیە ئەنجومەنی وەزیرانی ئیسرائیل كۆبوونەوەی تایبەت بە چارەنوسی زەویەكانی ئەو گەڕەكەی قودسی دواخست، ئەمەش بە هۆی ترس لە فراوانتربوونی ناڕەزایەتیەكان.
بەهۆی هەوڵی پۆلیسی ئیسرائیل بۆ چۆڵكردنی زۆرەملێی گەڕەكی شێخ جەڕاح خۆپیشاندان بەشێكی فراوانی قودسی رۆژهەڵات و چەند ناوچەیەكی تری گرتوەتەوە و زیاتر لە 200 خۆپیشاندەر برینداربوون.
ئیسرائیل لە دوای شەڕەكانی 1967 دەستی بەسەر ئەو گەڕەكەدا گرتووە و لە پلانیدایە فەلەستینیەكان لەو گەڕەكە دەربكات.
ئەو هەوڵەی ئیسرائیل رووبەڕووی رەخنەی توندی نەتەوەیەكگرتوەكان و یەكێتی ئەوروپا و چەند وڵاتێك بووەتەوە.
