وتەبێژی وەزارەتی شارەوانیی حكوومەتی هەرێمی كوردستان رایگەیاند، پلانی حكوومەتی هەرێم ئەوەیە، رێژەی سەوزایی لە هەرێم بگاتە سەرووی ستانداردی جیهانی، بۆیە ئێستا دروستكردنی پشتێنەی سەوزایی ھەولێر، پڕۆژەكەی ئامادەیە و تەنها ماوە جێبەجێ بكرێت.
كوردۆ شابان وتەبێژی وەزارەتی شارەوانیی حكوومەتی هەرێمی كوردستان بە ماڵپەڕی فەرمی پارتی وتووە، لەبارەی پشتێنەی سەوزایی هەولێر، لە كۆبوونەوەی ئەنجومەنی راوێژكاریی وەزارەتدا بڕیار درا پێداچوونەوە بە ماستەرپلانەكەدا بكرێت و ئێستا لە بەڕێوەبەرایەتیی نەخشەدانان كاری تێدا دەكرێت و دواتریش دەست بە جێبەجێكردنی دەكرێت، بۆیە پڕۆژەكە ئامادەیە و تەنها ماوە جێبەجێ بكرێت.
وتیشی، پشتێنەی سەوزایی لە دوای150مەتری دەست پێدەكات و پانتاییەكەی دوو كیلۆمەتر دەبێت، هەروەها نزیكەی 165كم درێژییەكەی دەبێت و حكوومەتیش زۆر جیددییە لەسەر جێبەجێكردنی ئەو پڕۆژەیە.
ناوبراو باسی لەوەش كرد: “پلانی كابینەی نوێی حكوومەتی هەرێمی كوردستان ئەوەیە، كە گرنگی بە زیادكردنی رێژەی سەوزایی بدات لە هەموو هەرێمی كوردستاندا، بۆیە نەك تەنها لە هەولێر، بەڵكو لە سلێمانی و دهۆكیش ماستەرپلانی بۆ داڕێژراوە، بۆیە پێویستە رێژەی سەوزایی بگاتە سەروو ستانداردی جیهانی، كە بێگومان ئێمە بەراورد بە عێراق زۆر باشترین و دەشمانەوێت خۆمان بەراوردی ئەو وڵاتانە بكەین كە رێژەی سەوزاییان زۆرە”.
