سەرۆكی تیمی پارێزەرانی بەدەل بەرواری رایگەیاند، رۆژی 17ی مانگی ئاب بەدەل بەرواری یەك لە چالاكوانە دەستگیركراوانی بادینان دادگایی دەكرێت.
ئاسۆ هاشم سەرۆكی تیمی پارێزەرانی بەدەل بەرواری باسی لەوەكرد، دادگای تاوانەكانی دووی هەولێر رۆژی 17ی مانگی ئابی بۆ دادگایكردنی مامۆستا بەدەل بەرواری دیاریكردووە.
راشیگەیاند، ئەو وادە دورو درێژە كە دوای زیاتر لەسێ مانگی دیكەیە، پێچەوانەی یاسایە لەكاتێكدا تەواوی دۆسیەكە ئامادەیە بۆ بەردەم دادوەر.
لە 22ی تشرینی یەكەمی ساڵی رابردوودا، هێزە ئەمنیەكان چوونەسەر ماڵی ژمارەیەك چالاكوان و رۆژنامەنووس لە سنوری پارێزگاكانی دهۆك و هەولێر و دەستگیریانكردن و تا ئێستاش چارەنوسی بەشێكیان نادیارە.
لە مانگی شوباتی ئەمساڵدا پێنج لەو چالاكوان و رۆژنامەنوسانە لە لایەن دادگای هەولێرەوە سزای شەش ساڵ زیندانیان بەسەردا سەپێنرا و لە رۆژانی رابردووشدا دادگای پێداچوونەوەی هەرێم سزاكەی پەسەندكرد و ئەوەش لەسەر ئاستی ناوخۆ و دەرەوە كاردانەوە و ناڕەزایەتی زۆری لێكەوتەوە.
