دوای پشووەكانی جەژن وەفدێكی هەرێمی كوردستان سەردانی بەغداد دەكات، ئەندامێكی لیژنەی دارایش دەڵێت، سەردانی وەفدەكە بۆ جێبەجێكردنی یاسای بودجەی عێراقە.
شیروان میرزا پەرلەمانتاری یەكێتی و ئەندامی لیژنەی دارایی لە پەرلەمانی عێراق بە میدیاكانی حزبەكەی راگەیاندوە، وەفدێكی هونەری حكومەتی هەرێم دوای پشوەكانی جەژن سەردانی بەغداد دەكات، بەمەبەستی گفتوگۆكردن لەسەر چۆنیەتی جێبەجێكردنی ماددەی 11 لە پڕۆژە یاسای بودجەی گشتی عێراق بۆ ساڵی 2021.
وتیشی، وەفدەكەی هەرێم گفتوگۆ دەكات لەسەر چۆنێتی رادەستكردنی داهاتی نەوت و ئەو بڕەی دەبێت بەغداد لە بودجەی گشتی بۆ هەرێمی بنێرێت.
راشیگەیاند، ئەوەی پەیوەندی بە نەوت و بەرهەمی نەوتییەوە هەیە لە نێوان حكومەتی هەرێم و حكومەتی فیدراڵی یەكلایی دەكرێتەوە، بەڵام ئەوەی پەیوەندی بە داهاتی نانەوتییەوە هەیە، لە نێوان هەردوو دیوانی چاودێری دارایی هەرێم و عێراق گفتوگۆی لەسەر دەكرێت و یەكلایی دەكرێتەوە.
