محەمەد شەبەكی ئەندامی پەرلەمانی عێراق لەسەر پشكی پارێزگای نەینەوا دەڵێت: 100 خێزان لە خێوەتگەی هولەوە هێنراونەتە ناو خاكی عێراق و ئامانج لەو كارەش تێكدانی سەقامگیری هەندێك ناوچەیە.
محەمەد شەبەكی لە لێدوانێكی رۆژنامەوانیدا باسی لەوەكردوە: 100 خێزان لە خێوەتگەی هول لە سوریاوە هێنراونەتە خێوەتگەی جەدعە لەناو عێراق، ئەوەش بەهۆی پەستانە نێودەوڵەتییەكانەوە لەسەر عێراق.
پێشی وایە: كێشەی گەورە لە باكوری عێراق هەیە وەك جوڵەكانی توركیا و بۆردومانكردنی چەند ناوچەیەك و هەوڵدان بۆ كۆنترۆڵكردنی خاكی زیاتر، ئەوەش سەرەڕای گواستنەوەی ئەندامانی داعش لە سوریاوە بۆ عێراق.
ئەو پەرلەمانتارە پێشی وایە: هەندێك لەو دزەكردنە ئەمنییانە كە لە موسڵ و كەركوك روویاندا ئەوە پیشان دەدات كە پەیوەندییەك لە نێوان هەموو ئەو رووداوانەدا هەیە، ئەویش بۆ تێكدانی سەقامگیری و بارودۆخی سنورەكانە لەگەڵ سوریا.
