هەرچەندە لە كۆی 15 ئەندامی ئەنجومەنی ئاسایشی نێودەوڵەتی 14 ئەندامیان لەگەڵ ئەوەدابوون بەیاننامەیەك لە بارەی دۆخی ئێستای نێوان ئیسرائیل و فەلەستینیەكان دەربكرێت، بەڵام ئەمریكا رێگری لەو كارە كرد.
ئاژانسی فرانس پرێس لە زاری دیپلۆماتێكەوە بڵاویكردەوە، لە كۆبوونەوەی داخراوی ئەنجومەنی ئاسایش 14 ئەندام لەگەڵ دەركردنی بەیاننامەیەكی هاوبەشدا بوون لە بارەی رەوشی ئێستای نێوان فەلەستین و ئیسرائیل كە بە هۆیەوە دەیان كەس كوژراون.
وتیشی، ئەمریكا بە پاساوی ئەوەی دەركردنی بەیاننامەیەكی لەو چەشنە لە دۆخی ئێستادا خزمەت بە هێوربوونەوەی گرژییەكان ناكات، رێگری لە دەركردنی ئەو بەیاننامەیە كردووە.
هاوكات بە وتەی سەرچاوەیەكی دیكە لە سەر داوای فەلەستینیەكان دانیشتنی داهاتووی ئەنجومەنی ئاسایشی نێودەوڵەتی كراوە دەبێت.
دوابەدوای هەوڵەكانی ئیسرائیل بۆ دەركردنی چەند بنەماڵەیەكی دانیشتووی گەڕەكی شێخ جەڕاح لە ماڵەكانیان، خۆپیشاندان و ناڕەزایەتی قودسی رۆژهەڵاتی گرتەوە و دواتر بە هۆی هێرشی موشەكی گروپە فەلەستینیەكان لە كەرتی غەزەوە، سوپای ئیسرائیلیش بەرپەرچی دانەوە و تائێستا نزیكەی 70 فەلەستینی و 7 ئیسرائیلی كوژراون.
