وەزیری تەندروستی حكوومەتی هەرێمی كوردستان لە پەیامێكدا كە بەبۆنەی جەژنی رەمەزان بڵاویكردووەتەوە تێیدا داوا لە هاوڵاتیان دەكات پابەندی رێنماییە تەندروستی و خۆپارێزییەكان بن.
سامان بەرزنجی، وەزیری تەندروستی لە پەیامەكەیدا كە ئاراستەی هاووڵاتییانی كردووە و تێیدا رایگەیاندووە: “سوپاستان دەكەین بۆ پابەندبوونتان بە رێنوێنییە تەندروستییەكان لە ماوەی ڕابردوودا، لە ئێستادا ترسناكی بڵاوبوونەوەی ئەم ڤایرۆسە تەواو نەبووە و هەر بوونی هەیە، تكایە خۆتان دوور بگرن لە قەرەباڵغی و سەردان و بەركەوتن و نزیك بوونەوەی ڕاستەوخۆ، دانانی ماسك زۆر گرنگە و هۆكاری سەرەكی خۆپارێزیە بۆ خۆت و خانەوادە و كەسانی دەووروبەرت”.
راشیەیاندووە: “ئەو ڕێككارانەی دەگیرێتەبەر بۆ سەلامەتی و پاراستنی ئێوەی خۆشەویستە، ئومێدەوارین هەموو پێكەوە خۆپارێزی كەسی و ئامۆژگاریەكانی تەندروستی جێبەجێ بكەین، هیوادارین ئەو ئاستەنگیانەی هاتوونەتە پێش بە زووترین كات تێیپەڕێنین و هەمووان ئاسودەی ژیانێكی ئاسایی و تەندروست بین”.
