پارێزگاری هەولێر پێشوازی لەو خێزانە كرد، كە لە شاری مەرسینی توركیا، هێرشیان كرایە سەر و رایگەیاند، پارێزگاری لە هاووڵاتیانی خۆمان دەكەین لەهەر شوێنێك بن.
ئومێد خۆشناو، پارێزگاری هەولێر، لە كۆنگرەیەكی رۆژنامەوانیدا رایگەیاند، كەیسی هێرشكردنە سەر ئەو خێزانەی هەولێر لە توركیا كۆتایی نەهاتووە و نامەیەك ئاراستەی كۆنسوڵی توركیا دەكەین و ئەو بەڵگانەش دەخەینەڕوو، كە لەلایەن ئەو خێزانەوە بەدەستیان گەیشتووە.
پارێزگاری هەولێر، سوپاسی هەموو ئەو كەس و لایەنانەی كرد، كە لەسەر كەیسەكە هاتوونەتە دەنگ و لە سەرەتاوە لەگەڵیان بوون و هاوكار بوون لە بەدواداچوونی كەیسەكە.
ئومێد خۆشناو جەختی لەوەشكردەوە، شكۆی هاووڵاتیانی خۆمان لەهەر شوێنێك بێت دەپارێزین و دووپاتی كردەوە، چۆن پێداگری لەسەر سەلامەتی گیانی هاووڵاتیانی هەولێر دەكەینەوە، بە هەمان شێوە پارێزگاری لەو كەس و گەشتیارانەش دەكەین كە سەردانی هەولێری پایتەخت دەكەن.
