ڕۆژنامەیەكی بەریتانی وێنەی سێ گەریلای شەهیدی بڵاو كردووەتەوە، ئاماژەی بەوەشكردووە، ئەو سێ گەریلایە بە چەكی كیمیایی سوپای توركیا لە ناوچەی ئاڤاشین شەهید بوون و جەختیشیكردوەتەوە، كە ئەمە چەندین جارە توركیا لە دژی كوردان چەكی كیمیاوی بەكار دێنێت و دونیا بێدەنگە.
ڕۆژنامەی مۆڕنینگ ستاری بەریتانی چەند وێنە و دیمەنی سێ گەریلای لە ئاڤاشین بڵاوكردۆتەوە، كە ڕۆژی سێی ئایار شەهید بوون و وەك باسی كردووە، هیچ ئاسەوارێكی برینداربوون لە سەر تەرمی گەریلاكان نابینرێت و پشتڕاستی دەكاتەوە، كە سوپای توركیا چەكی كیمیایی لەدژی گەریلاكان بەكار هێناوە و بەوشێوازە شەهیدیی كردوون.
مۆڕنینگ ستار بەبیریهێناوەتەوە، كە بەڕێوبەرانی كەجەكە و پەكەكە چەندینجار هۆشداریان داوە لە بەكارهێنانی چەكی كیمیایی لەلایەن دەوڵەتی توركەوە، كە پێچەوانەی پەیمانی 1997ی پێشگرتن لە بەكارهێنانی چەكی كیمیاییە كە توركیاش واژۆی لەسەر كردووە.
ڕۆژنامەكە هاوكات سەرنجی ڕاكێشاوەتەسەر ئەوەی، كە ئەمە جاری یەكەم نییە كە دەوڵەتی توركیا لە دژی كوردان چەكی كیمیایی بەكاردێنێت، بەڵكو لە دژی شەنگال و كامپی پەنابەرانی مەخموریش بەكاریهێناوە، هەروەها ساڵی 2019 لە سەرێكانی دەوڵەتی تورك چەكی قەدەغەكراوی فسفۆڕی لە دژی كوردان بەكارهێنابوو، بەڵام لەدژی ئەم پێشلكاریی و تاوانەی توركیا تائێستا كۆمەڵگای نێودەوڵەتی بێدەنگی هەڵبژاردووە.
