قوباد تاڵەبانی جێگری سەرۆك وەزیرانی هەرێمی كوردستان لە میانەی سەردانەكەیدا بۆ كۆماری ئەرمینیا بە جیا لەگەڵ مهر گریگۆریان، جێگری سەرۆك وەزیران و هایك چۆپانیان، وەزیری پیشەسازیی تەكنەلۆژیای زانیارییەكانی ئەرمینیا كۆبووەوە و لەگەڵ هەردوولا گەیشتنە كۆمەڵێك رێككەوتنی سەرەتایی.
لە هەردوو كۆبوونەوەكەدا، تاوتوێی چۆنییەتی پەرەپێدانی پەیوەندییەكانی نێوان هەرێمی كوردستان و كۆماری ئەرمینیا كرا. هەروەها بڕیاردرا تیمی هاوبەش لەنێوان هەرێمی كوردستان و وڵاتی ئەرمینیا دروست بكرێت بە مەبەستی گواستنەوەی ئەزمونی ئەرمینیا لەڕووی بە ئەلكترۆنیكردنی حكومەت و پەرەپێدانی تەكنەلۆژیای زانیاری.
لەتەوەرێكی تری قسەكاندا، باسی پێكەوەبەستنی زانكۆ پۆلی تەكنیكییەكانی كوردستان و ئەرمینیا كرا بەمەبەستی ئەنجامدانی كاری هاوبەشی زانستی.
لە درێژەی سەردانەكەیدا بۆ ئەرمینیا، جێگری سەرۆك وەزیران و وەفدی یاوەری لەگەڵ شاندێكی یەكێتی كۆمپانیا پێشكەوتووەكانی بواری تەكنەلۆژیای زانیارییەكانی ئەرمینیا كۆبووەوە، پاش گفتوگۆی چڕ رێككەوتنێكی سەرەتایی كرا بۆ ئەوەی كۆمپانیاكانی ئەرمینیا بێنە هەرێمی كوردستان و لە چوارچێوەی پڕۆژەیەكی بەرفراواندا منداڵ و نەوجەوانانی تەمەن 10_18 ساڵان فێری ئای تی و تەكنەلۆژیای زانیاری بكەن كە ئەمە پرۆگرامێكی تایبەتی كۆماری ئەرمینیایە.
