لەمیانی رێورەسمی كردنەوەی كارگەی بەرهەمهێنانی شیش لە هەولێر، مەسرور بارزانی سەرۆكی حكومەتی هەرێم، پشتیوانی خۆی بۆ كەرتی تایبەت دوپاتكردەوە.
مەسرور بارزانی لە وتارەكەیدا رایگەیاند، تەنها بەڵێن نادەن، بەڵكوو بەڵێنەكانیشیان جێبەجێ دەكەن، بۆ ئەوەش ئاماژەی بە بەڵێنەكانیان بۆ پشتیوانی لە كەرتی تایبەت و فرەچەشن كردنی سەرچاوەكانی داهات كرد.
سەرۆكی حكومەتی هەرێم جەختیشی كردەوە، بەردەوام دەبن لە پاڵپشتییەكانیان بۆ كەرتی تایبەت و وتی: جێگەی شانازییە كە رۆژ لە دوای رۆژ پڕۆژەی ستراتیژی زیاتر كوردستان دەكرێنەوە.
مەسرور بارزانی باسی لەوەشكرد: كوردستان دەوڵەمەندە بە كانزاكان و سامانە سرووشتییەكەی، بەڵام تاكو ئێستا وەكو پێویست سوودی لێوەرنەگیراوە، بەڵام ئێمە هەموو هەوڵێك دەدەین بۆ دروستكردنی ئەو ژێرخانە ئابوورییەی كە پێویستە كوردستان بخاتە سەر نەخشەی وڵاتانی پێشكەوتوو.
كارگەی ئاسن مێد ستیل بە تێچووی 100 ملیۆن دۆلار لە هەولێر دروستكراوە و رۆژانە توانای بەرهەمهێنانی 350 هەزار تۆن شیش و شێلمانی هەیە و بە یەكێك لە گەورەترین كارگەكان لەسەر ئاستی هەرێمی كوردستان و عێراق دادەنرێت.
