كوردێكی رۆژهەڵاتی كوردستان لە بەردەم بارەگای نەتەوە یەكگرتووەكان لە شاری هەولێر ئاگر لە خۆی بەردەدات، ئەوەش بەهۆی جێبەجێ نەكردنی داواكارییەكانیان.
بەپێی زانیاریەكان، گەنجەكە كە ناوی “محەمەد”ەو خەڵكی شاری بۆكانی رۆژهەڵاتی كوردستانە، لەگەڵ ژمارەیەك هاوڕێی تری چوونەتە بەردەم بارەگای نەتەوە یەكگرتووەكان لە شاری هەولێر و داوای جێبەجێكردنی داواكارییەكانیانیان كردووە.
بەپێی ئەو گرتە ڤیدیۆییانەی بڵاوكراونەتەوە، گەنجەكە دەبەیەك بەنزین و چەرخێكی پێیە و بەنزینەكە دەكات بەخۆیدا و ئاگر لە خۆی بەردەدات، دواتر لەلایەن هاوڕێیەكییەوە دەكوژێنرێتەوە.
ئەو گەنجە كە بەشێك لە دەستەی سوتاوە، هەڵدەستێنرێتەوە و بەپێی خۆی دەچێتە ناو ئۆتۆمبێلی فریاكەوتنەوە و دەگوازرێتەوە بۆ نەخۆشخانە بۆ وەرگرتنی چارەسەر، بەپێی زانیارییەكان محەمەد ماوەی 4 ساڵە لە هەرێمی كوردستان دەژی.
