عەلی باپیر ئەمیری كۆمەڵی دادگەری كوردستان دەڵێت، دوای 30 ساڵ نەمانتوانیوە حكومڕانییەكی جوان پیشان بدەین و لە رووی سیاسییەوە دواكەوتووین، كەس دروشمی دیموكراسی لەو حزبە ناكڕێت كە لە ناوخۆیدا دیكتاتۆرییە و خۆی فەرز دەكات.
عەلی باپیر لە كۆنفرانسی یەكڕیزی لە پێناو دەستوور لە وتەیەكدا وتی، هەر كەسێك باسی دیموكراسی و ئازادی بیروڕا دەكات بەشێوەیەك سەیری دەكەم كە لەناو ماڵ و حزبەكەی و لەگەڵ كەسانی ژێر دەستی چۆن مامەڵە دەكات، حزبێك باسی دیموكراسی دەكات بەڵام لەناوخۆیدا دیكتاتۆریییە ئەوە خۆفەرزكردن و تەبەقە بەندییە، كێ ئەو درشمە دەكڕێت.
ئاماژەی بەوەشداوە، كۆسپێكی بەردەم دەستور ناسنامەی ئاینییە، رێكناكەوین لەوەی تام و بۆیەكی ئیسلامی لێبێت لەكاتێكدا دەنگمان داوە بە دەستوری عێراق كە ناسنامەی ئایینی چەسپاندووە، ئاستەنگی گەورەی بەردەم دەستوور بێ باوەڕییە بە دروشمەكان و رێز لە ئایینی ئیسلام نەگیراوە لە رەشنووسی دەستور وەك ئەوەی عێراق.
ئەمیری كۆمەڵی دادگەری كوردستان لە بەشێكی تری قسەكانیدا وتی، ئەگەر تەبا نەبین ناتوانین ببینە خاوەنی دەستوور، دوای 30 ساڵ نەمانتونیوە حوكمڕانییەكی جوان نیشان بدەین و ئێمە لە رووی سیاسییەوە دواكەوتووین، ئێستاش لە هەمووكات زیاتر پێویستمان بە یەكڕیزی هەیە، لەبەر نەبوونی دادگەری تەبایی بەدینەهاتووە ئەگەر داهاتەكانی وڵاتیش بەدەستێكی ئەمینەوە بێت بێمنەت دەبین لە بەغدا، ئێمەی موسڵمان دەستمان لە قورئانەكەمان بەرداوە بۆیە دواكەوتووین، بەڵام وڵاتانی ئەوروپا دەستیان لە ئایینە تێكدراوەكەیان بەرداوەو بەرەو پێشەوە چوون.
