جینین هێنیس پلاسخارت نوێنەری تایبەتی سكرتێری گشتی نەتەوە یەكگرتووەكان لە عێراق دەڵێت، بەرژەوەندی تەسكی حزبایەتی رێگرە لە هەنگاونان بۆ یەكخستنەوەی هێزی پێشمەرگە چیتر نابێ بەسەر دوو ناوچەی زەرد و سەوز یان بەسەر هەر رەنگێكی دیكەدا دابەش بێت.
پلاسخارت لە وتەیەكدا لە پانێڵی “هەرێمی كوردستانی عێراق: دەستوور و یەكڕیزی” لە زانكۆی كوردستان لە شاری هەولێر وتی، هەرگیز وامەزانن ئەم جۆرە ئوتۆنۆمییە هەر بە مسۆگەری هەتاهەتایی دەمێنێتەوە، هەر بۆیە یەكڕیزی بۆ مانەوەی ئەم قەوارەیە لەوپەڕی پێویستیدایە و كلیلی بەردەستی لایەنەكانە بۆ دەربازبوون لە مەترسییەكان.
رونیشیكردەوە، كوردستانێكی بەهێز مانای ئەوەیە بتوانێت بە باشترین شێوە بەرژەوەندییەكانی بپارێزێت، بە پێچەوانەشەوە پەرتەوازەیی دەبێتە هۆی لاوازی، بەرژەوەندی تەسكی حزبایەتی وایكردووە رێگربێت لە هەنگاونان بۆ یەكخستنەوەی هێزی پێشمەرگە و ئەنجامدانی چاكسازی.
نوێنەری تایبەتی سكرتێری گشتی نەتەوە یەكگرتووەكان ئاماژەی بەوەشدا، چیتر نابێت هەرێم بەسەر دوو ناوچەی زەرد و سەوز یان بەسەر هەر رەنگێكی دیكەدا دابەش بێت، هەر بەڕاستی كاتی ئاشتبوونەوە و یەكگرتن هاتووە بۆ ئەوەی سەقامگیری سیاسی بێتە ئاراوە.
