سەرۆكی دەستەی عێراقی بۆ كۆنترۆڵكردنی مادە تیشكدەرەوەكان ئاشكرایكرد، لیژنەی نیشتمانی بۆ وێستگە ئەتۆمییەكان 20 پێگەی پاڵاوتووە بۆ دروستكردنی وێستگەی ئەتۆمی لە عێراق و لە كۆتاییدا دوانیان هەڵدەبژێردرێن.
كەمال حسێن لەتیف سەرۆكی دەستەكە لە لێدوانێكی رۆژنامەوانیدا باسی لەوەكردووە، بەشێوەیەكی سەرەتایی 20 پێگە بۆ دروستكردنی وێستگەی ئەتۆمی دیاری كراون ئەویش بەپێی پێودانگە زانستییە جیهانییە پشت پێ بەستراوەكان.
رونیشیكردووەتەوە، لەكۆتاییدا لەو پێگانە دوانییان دیاری دەكرێن، یەكێكی بنەڕەتی و پێگەیەكی شوێنگرەوە، پرۆسەكە بە دوو رێگەی زانستی ورد ئەنجام دراوە كە پێیان دەوترێت “كینی” و “سایت”.
كەمال حسێن جەختیلەوەشكردووەتەوە، مەرجەكانی دیاریكردنی شوێنەكە ئەوەیە كە دووربێت لە ناوچەی نیشتەجێبون و لەماوەی 50 ساڵی رابردوودا بومەلەرزە لە 2 پلە بەپێوەری رێختەر زیاتر رووینەدابێت و لەرووی ئەمنییەوە پارێزراو بێت و خاكەكەی جێگیر بێت تا دووری 20 كیلۆمەتر لە پێگەكەوە شاخ و گرد و دۆڵ بوونی نەبێت و لە 350 مەتر لە رووی دەریاوە بەرزتر نەبێت.
