عەباس سروت ئەندامی لیژنەی ئاسایش و بەرگری پەرلەمانی عێراق دەڵێت، هەماهەنگی باڵا لە نێوان سوپا و پێشمەرگە هەیە و ئەوەش واتای گەڕانەوەی پێشمەرگە نییە بۆ كەركوك و شارەكان.
عەباس سروت لە لێدوانێكی رۆژنامەوانیدا باسی لەوەكردووە، سنوری ئیداری نێوان پارێزگاكان و هەرێمی كوردستان بەدەست بۆشایی ئەمنی گەورەوە دەناڵێنن، بەهۆی ئەوەشەوە لە ماوەی دواییدا مەترسی ئەمنی دروست بووە و بەردەوام دزەكردن هەیە.
رونیشیكردووەتەوە، ئەوەش بووە هۆی ئەوەی هەماهەنگی باڵا لەنێوان بەغدا و هەرێم لەپێناو دانانی چارەسەری بنەڕەتی بۆ ئەو كێشەیە و رێگەگرتن لە گەورەتر بوونی، سەردانی وەزیری بەرگریش لەماوەی رابردودا بۆ كەرتەكانی باكور لەچوارچێوەی ئەو هەماهەنگییەدا بوو بۆ تەواوكردنی كۆتا رێوشوێنەكانی دانانی پلانێكی نوێ بۆ رێگەگرتن لە مەترسیەكانی داعش ئەویش لەرێگەی هەماهەنگی زانیاریی لەنێوان سوپا و پێشمەرگە.
ئەندامەكەی لیژنەی ئاسایش و بەرگری جەختیلەوەشكردوەتەوە، ئەوەش واتای ئەوە نییە كە پێشمەرگە دەگەڕێتەوە شارەكان، ئەگەر سنورەكان بە باشی كۆنترۆڵ بكرێن و كۆتایی بە مەلەفی بۆشایی ئەمنی بهێنرێت، ئەوا كاریگەری ئیجابی لەسەر ئاسایش پارێزگاكان دەبێت بە هەرێمی كوردستانیشەوە.
