جێگری سەرۆکی هەرێمی کوردستان رایگەیاند، دەستور بۆ کوردستان پێویستیه‌کی نیشتمانییه، هەروەها یەکڕیزی و دەستور هەردووکیان پێکه‌وه بەستراون و تەواوکەری یەکترن.
مستەفا سەید قادر جێگری سەرۆکی هەرێمی کوردستان لەگەڵ کلێمنس سێمنتنەر کونسوڵی گشتیی ئەڵمانیا لە هەرێمی کوردستان کۆبووەوە و رایگەیاند، دەستور بۆ کوردستان پێویستیه‌کی نیشتمانیه، یەکڕیزی و دەستور هەردووکیان پێکه‌وه بەستراون و تەواوکەری یەکترن، یەکڕیزیی لایەنە سیاسییەکان و جیاکردنەوەی دەسەڵاتەکان و یەکخستنی پێشمەرگە و جێبەجێ کردنی چاکسازی دەبێتە مایەی جێبەجێ کردنی دەستوور و پابەندبوون پێوەی.
بەپێی راگەیەنراوێکی نوسینگەی جێگری سەرۆکی هەرێمی کوردستان لەکۆبوونەوەکەدا بارودۆخی سیاسی هەرێمی کوردستان و عێراق بەگشتی وهاوپەیمانی سیاسی بۆ هەڵبژاردنی داهاتووی عێراق و یەکڕیزیی لایەنە سیاسییەکان لەهەرێمی کوردستان و هه‌وڵه‌کانی ئامادەکردنی دەستور و چەند پرسێکی دیکە تاوتوێ کراون.
جێگری سەرۆکی هەرێمی کوردستان پشتیوانی و هاوکارییەکانی ئەڵمانیای بۆ هەرێمی کوردستان لە بواری سەربازی و چەک و لۆجستی و کەرتەکانی تەندروستی و ئاو و پەنابەراندا بەرز نرخاندوە و داوایکردوە، ئەڵمانیا ڕۆڵی لە یەکخستنەوەی پێشمەرگەدا هه‌بێت و هانی کۆمپانیاکانی وڵاتەکەیان بدەن بێنە کوردستان و لە پرۆسه‌ی گەشەپێدانی ژێرخان و بوژانەوه‌دا بەشدار بن.
