ئاسایشی نیشتمانی ئەمریكا: پشتگیری كازمی دەكەین

بەهۆی گرژیەكانی رۆژی چوارشەممە لە ئەنجامی دەستگیركردنی سەركردەیەكی حەشدی شەعبی، راوێژكاریی ئاسایشی نیشتمانی ئەمریكا پشتگیری خۆی بۆ مستەفا كازمی سەرۆك وەزیرانی عێراق راگەیاند.
راوێژكاریی ئاسایشی نیشتمانی ئەمریكا لە تۆڕی كۆمەڵایەتی تویتەر بڵاویكردووەتەوە، بە بەهێزی پشتگیری مستەفا كازمی سەرۆكی حكومەتی عێراقی دەكەین بۆ سەپاندنی سەروەری یاسا و خۆشكردنی رێگە بۆ ئەنجامدانی هەڵبژاردنێكی ئازاد و پاك.
ئەوەش هاتووە، پێویستە لێكۆڵینەوە لە هەر كەسێك بكرێت كە هاوڵاتیانی عێراق دەكاتە ئامانج، ئەوەش بەپێی یاسا عێراقییەكان، ئیدانەی ئەو كەسانە دەكەین كە دەیانەوێت بە كارە توندوتیژەكانیان سەقامگیری تێكبدەن.
بەرەبەیانی رۆژی چوارشەممە هێزێكی عێراقی بەتۆمەتی تیرۆر “قاسم موسڵح” سەركردەی حەشدی شەعبییان لە ئەنبار دەستگیر كرد، بەهۆی ئەوەشەوە گروپە چەكدارەكانی سەر بە حەشد ناوچەی سەوزیان گەمارۆدا و هەڕەشەی داگیركردنیان دەكرد ئەگەر ئەو سەركردەیان ئازاد نەكرێت.