قوباد تاڵەبانی لەگەڵ شاندێكی یەكێتیی ئەوروپا كۆبووەوە، گفتوگۆیان لەبارەی چاكسازییەكانی حكومەتی هەرێمی كوردستانەوە كرد و داوای لە وڵاتانی یەكێتیی ئەوروپا كرد پاڵپشتییان بكەن.
قوباد تاڵەبانی، جێگری سەرۆكوەزیرانی هەرێمی كوردستان پێشوازیی لە مارتن هوس، باڵیۆزی یەكێتیی ئەوروپا لە عێراق و ڤینسینت پۆپیۆ، بەرپرسی نووسینگەی نێردەی یەكێتیی ئەوروپا لە هەرێمی كوردستان كرد.
لە كۆبوونەوەیەكدا هەردوولا پەیوەندییەكانی هەرێمی كوردستان و حكومەتی فیدراڵییان تاوتوێ كرد و جێگری سەرۆكوەزیران پابەندبوونی حكومەتی هەرێمی كوردستانی بە جێبەجێكردنی یاسای بودجەی فیدراڵی دووپاتكردەوە.
لە تەوەرێكی دیكەی كۆبوونەوەكەدا گفتوگۆ كرا لەبارەی چاكسازییەكانی حكومەتی ھەرێم كە تاوەكو ئێستا هەنگاوی باشیان بڕیوە، هەروەها جەخت لە بەردەوامیی چاكسازییەكان و شۆڕكردنەوەیان كرایەوە و بۆ ئەو مەبەستەش قوباد تاڵەبانی داوای پاڵپشتیی وڵاتانی ئەوروپای كرد كە ئەزموونی زۆریان هەیە لەو بوارەدا.
هەروەها قوباد تاڵەبانی داوای هاوكاریی كۆمەڵگەی نێودەوڵەتیی كرد بۆ هەنگاوەكانی حكومەتی هەرێمی كوردستان تاوەكو بتوانێت لە فراوانكردنی ئازادییەكان و پەرەپێدانی بەهاكانی دیموكراسی بەردەوام بێت.
