ناوەندی ستراتیژی بۆ مافەكانی مرۆڤ دەڵێت، ملیۆنێك و 500 هەزار لەو كەسانەی بۆ یەكەمجار دەتوانن بەشداری هەڵبژاردن بكەن لە دەنگدان بێبەش دەبن، ئەوەش تەنها بەهۆی ئەوەی زانیارییەكانی بایۆمەترییان نوێ نەكردووەتەوە.
حازم رەدیینی بەڕێوەبەری ناوەندی ستراتیژی بۆ مافەكانی مرۆڤ لە لێدوانێكی رۆژنامەوانیدا وتویەتی، پێویستە كۆمسیۆنی هەڵبژاردنەكان لە بڕیاری چاپ نەكردنی كارتی دەنگدانی ماوە كورت بۆ لەدایكبوانی ساڵانی 2001 و 2002 و 2003 كە بایۆمەترییان نوێ نەكردووەتەوە پەشیمان ببێتەوە.
رونیشیكردووەتەوە، ئەو كەسانە ژمارەیان دوو ملیۆن و 500 هەزار كەسە و نزیكەی یەك ملیۆنیان زانیاریەكانی بایۆمەترییان نوێكردووەتەوە كە ئەوەش 40% دەكات، یاسای نوێی هەڵبژاردن رێگەی داوە بە دەنگدەر كە لە رێگەی كارتی ئەلكترۆنییەوە دەنگ بدات، واتا كارتی بایۆمەتری و كارتی ئەلكترۆنی كورت مەوداش دەگرێتەوە.
رەدیینی جەختیلەوەشكردووەتەوە، پێویستە كۆمسیۆن پابەند بێت بە چاپ كردنی كارتی كورت مەودا بۆ ئەو ملیۆن و 500 هەزارەی كە زانیاریەكانی بایۆمەترییان نوێنەكردووەتەوە، ئەوەش لەپێناو پاراستنی مافیان لە رۆژی هەڵبژاردندا.
