جینین هێنیس پلاسخارت نوێنەری تایبەتی سكرتێری گشتیی نەتەوەیەكگرتوەكان لە عێراق، رایگەیاند، پەنابردنە بەر نمایشی هێز بۆ بەدەستهێنانی داخوازییەكان پایەی دەوڵەتی عێراق بێهێز دەكات و متمانەی خەڵكیش لاواز دەكات و جەختی لەوەشكردووەتەوە كە كەس لە سەرووی یاساوە نییە.
پلاسخارت لەبارەی ئاڵۆزییەكانی بەغدا پایتەختی عێراق، لە هەژماری تایبەتی خۆی لە تۆڕی كۆمەڵایەتی تویتەر پەیامێكی كورتی بڵاوكردەوە.
نوێنەری تایبەتی سكرتێری گشتی نەتەوەیەكگرتوەكان لە عێراق لە پەیامەكەیدا جەختی لەوە كردووەتەوە كە پێویستە هەر كەیسێكی دەستگیركردن بە رێچكەی خۆیدا بڕوات هەروەك چۆن بۆ عێراقییەكان وایە”.
پلاسخارت نووسیوویەتی: “بەدڵنیاییەوە نابێت هیچ كەسێك پەنا بباتە بەر نمایشی هێز بۆ بەدەستهێنانی داخوازییەكان” و سەرنجی بۆ ئەوە راكێشاوە كە “ئەم جۆرە رەفتارانە پایەی دەوڵەتی عێراق بێهێز دەكات و متمانەی خەڵكیش لاواز دەكات”.
نوێنەری تایبەتی سكرتێری گشتی نەتەوەیەكگرتوەكان لە عێراق جەختی لە رێزگرتن لە دامەزراوەكانی دەوڵەت كردووەتەوە و رایگەیاندووە “پێویستە لە هەموو كاتێكدا رێز لە دامودەزەگاكانی دەوڵەت بگیرێت”.
پلاسخارت بەنووسینی “كەس لە سەرووی یاساوە نییە”، كۆتایی بە پایەمەكەی هێناوە.
رۆژی چوارشەممە دوابەدوای دەستگیركردنی فەرماندەیەكی حەشدی شەعبی ژمارەیەك لە ئەندامان و لایەنگرانی ئەو هێزە بە چەكەوە لە بەغدا خۆپیشاندانیان كرد.
