وەزارەتی بەرگریی ئەمریكا رایگەیاند، لەبەرامبەر ئەو هێرشە ئەلكترۆنیانەی دەكرێنە سەر دامەزراوەكانیان، لەمەودوا وەڵامی هێرشبەرانەیان دەبێت.
لۆید ئۆستن وەزیری بەرگریی ئەمریكا لە چاوپێكەوتنێكدا لەگەڵ سی ئێن ئێن سەبارەت بەو هێرشە ئەلكترۆنیانەی ماوەی رابردوو، كە دەوترێت لە لایەن گروپێكی روسییەوە ئەنجامدراون، رایگەیاند: واشنتن لە بەرامبەر ئەو هێرشانەدا پەنا بۆ بژاردەی هێرشبەرانە دەبات.
وتیشی، توانای ئەو جۆرە هێرشانەیان هەیە و دەتوانن بەرگریی لە خۆیان بكەن و لە گۆشە نیگای سەربازیشەوە لە هەموو ئەو پرسانە دەڕوانن كە پەیوەندییان بە كاروباریی بەرگرییەوە هەیە.
وەزیری بەرگریی ئەمریكا جەختیشی كردەوە، بۆ بەگژداچوونەوەی هێرشە ئەلكترۆنیەكان باشترین و كاریگەرترین وەڵامیان دەبێت.
پێشتر مایكرۆسۆفت بڵاویكردبوەوە، كە گروپێكی هاككەری روسی بە ناوی نوبلیۆم هێرشیكردۆتەوە سەر سێ هەزار هەژماری ئیمەیڵی 150 دامەزراوەی حكومی و پەیمانگای زانستی و ناوەندی دیكەی ئەمریكی.
