جوتیار عادل وتەبێژی حكومەتی هەرێمی كوردستان ئاشكرایكرد، رۆژی یەكشەممە وەفدی هەرێم سەردانی بەغدا دەكات بۆ گفتوگۆكردن لەسەر مەلەفە هەڵواستراوەكان، لەناویشیاندا رێكەوتن لەسەر بوجە و پشكی هەرێم.
ماڵپەڕی مەعلومە لە زاری جوتیار عادلەوە بڵاویكردووەتەوە، رۆژی یەكشەممە وەفدی هەرێمی كوردستان سەردانی بەغدا دەكات و وەفدەكە لە ژمارەیەك وەزیر پێكهاتوون.
رونیشیكردووەتەوە، ئامانجی سەردانەكە بۆ گفتوگۆكردنە لەسەر لێكتێگەیشتنەكانی تایبەت بە جێبەجێكردنی پرۆژە یاسای بودجە و ناردنی پشكی هەرێم لەلایەن بەغداوە.
وتەبێژی حكومەتی هەرێم جەختیلەوەشكردووەتەوە، تائێستا بەغدا بەپێی ئەو رێكەوتنەی كراوە پشكی هەرێمی كوردستان نەناردووە، حكومەتی هەرێمیش ئامادەیی تەواوی پیشانداوە بۆ جێبەجێكردنی رێكەوتنەكە و پاشەكشە ناكەین لە جێبەجێكردنی پابەندییەكان، ئەوەش لە كۆبوونەوەكانی رۆژی یەكشەممە لەگەڵ بەغدا جەختی لەسەر دەكرێتەوە.
