هۆگر عەزیز وتەبێژی بەڕێوەبەرایەتیی پۆلیسی پارێزگای هەولێر ئاشكرایكرد، لە چەند رۆژی رابردوددا چەند رووداوێكی كوشتن روویانداوە و بەهۆیانەوە لە 3 رۆژدا 11 تۆمەتبار دەستگیر كراون.
هۆگر عەزیز لە كۆنگرەیەكی رۆژنامەوانیدا وتی، لە چەند رۆژی رابردوودا چەند روداوێكی كوشتن روویاندا، 3 لە تاوانەكان لە هەولێر بوون و یەكێكیشیان لە بەغداد بووە، هێزەكانی پۆلیس لە سێ رۆژدا 11 تۆمەتباریان دەستگیر كردوە، 4 لە تاوانبارەكان بەهۆی كوشتنی هاوڵاتییەكەوە بووە بە چەقۆ.
وتەبێژی پۆلیسی هەولێر باسی لەوەشكردووە، هەروەها یەكیان تۆمەتبارێكی تەمەنی 18 ساڵە و بەهۆی كوشتنی گەنجێكی تەمەن 23 ساڵەوە دەستگیر گراوە، تۆمەتبارێكی تری تەمەن 56 ساڵ دەستیگر كراوە كە لە ناحیەی شاوێس گەنجێكی تەمەن 22 ساڵی كوشتووە، هەروەها تۆمەتبارێكی تر لە بەغدا تاوانی كوشتنی ئەنجامداوە و هەڵاتبوو بۆ هەولێر بۆ ئەوەی دواتر بچێتە توركیا بەڵام دەستگیر كرا، تۆمەتبارێكی تریش كە فەرمانی دەستگیر كردنی هەبووە بەهەمان شێوە دەستگیر كراوە.
هۆگر عەزیز هێمای بۆ ئەوەشكرد، لەكاتی هەوڵدان بۆ دەستگیركردنی تۆمەتبارێك بە نارنجۆك رووبەڕووی هێزەكانی پۆلیس بووەتەوە، بەڵام دەستگیر كراوە و دەستیش بەسەر نارنجۆكێك و كڵاشینكۆفێك و بڕێك مادەی هۆشبەردا گیراوە.
