ئەدهەم بارزانی ئەندامی پێشووی سەركردایەتی پارتی رایگەیاند: ناتوانێت لە وڵاتێكدا بمێنێتەوە كە دەوڵەتی تورك داگیری بكات و حكومەتی هەرێمیش بێدەنگ بێت.
ئەدهەم بارزانی لە لێدوانێكدا بۆ ئاژانسی فورات نیوز رایگەیاندووە: لە وڵاتێكدا، كە دەوڵەتی تورك داگیری بكات و لە بەرامبەر ئەوەدا حكومەتی هەرێم بێدەنگ ببێت، من ناتوانم تیادا بمێننەوە.
ئەدهەم بارزانی جەختیشی كردووەتەوە، “من بە هیچ شێوەیەك لە خاكی كوردستان هەڵنەهاتووم. لە ماوەیەكی نزیكدا من بە بزووتنەوەی گەلی شۆڕشگێڕییەوە دەگەڕێمەوە بۆ سەر خاكی خۆم. لەو رووەوە خەباتم هەیە و گەل پشتیوانی دەكات. بڕوام بە هیچ حیزبێك نییە. تەنها بڕوام بە بزووتنەوەی شۆڕشگێڕی هەیە. بۆ ئەوەش خەباتم و هەوڵم هەیە و لە ماوەیەكی نزیكدا دەگەڕێمەزوە بۆ كوردستان”.
دوای ئەوەی ئەدهەم بارزانی لە بانگەوازێكدا هۆشداری دابوو لەوەی توركیا دوای داگیركردنی ناوچەكانی هەرێم هاوشێوەی قوبرس و ئەسكەندەرون نیازی كشانەوەی نییە و بۆ رێگری لەوەش داوای هەڵوێستی لایەنە كوردستانی و عێراقی و نێودەوڵەتیەكانی كردبوو، دەنگۆی ئەوە بڵاوكرایەوە كە ناوبراو لە ژێر فشاردا ناچار بووە كوردستان جێبهێڵێت.
