سەرۆكی حكوومەتی هەرێمی كوردستان رایدەگەیەنێت، ئەگەر لە عێراق حوكمڕانییەكی باش هەبێت، ئەو وڵاتە دەبێتە یەكێك لە وڵاتە پێشكەوتووەكان.
بەپێی راگەیەندراوێك مەسرور بارزانی، سەرۆكی حكوومەتی هەرێمی كوردستان پێشوازیی لە ئەسعەد ئەلعیدانی، پارێزگاری بەسرە كردووە.
لە سەرەتای كۆبوونەوەكە، ئەسعەد ئەلعیدانی رەتی كردووەتەوە هەرێمی كوردستان لەسەر حیسابی بەسرە و پارێزگاكانی دیكەی عێراق پێشكەوتبێت و رایگەیاندووە: كە ئەوان لە بەسرە زۆر سوودیان لە ئەزموونی سەركەوتووی هەرێمی كوردستان لە بواری ئاوەدانكردنەوە و پێشكەشكردنی خزمەتگوزاری وەرگرتووە.
پارێزگاری بەسرە جەختی لەوە كردووەتەوە، كە عێراق وڵاتێكی فیدراڵییە و ناكرێ بەشێوەیەكی ناوەندی بەڕێوە ببرێت، پێویستە هەرێمی كوردستان و پارێزگاكان ”بەشێوەیەكی راستەقینە“ بەشداربن لە دەسەڵات و بڕیاردان.
هەروەها مەسرور بارزانی رایگەیاندووە: عێراق، لە ڕووی سامانی مرۆیی و سروشتییەوە وڵاتێكی دەوڵەمەندە و ئەگەر حوكمڕانی و بەڕێوەبردنێكی باش هەبێت، دەرفەتی ئەوەی هەیە ببێتە یەكێك لە وڵاتە پێشكەوتووەكانی ناوچەكە.
هەر لە كۆبوونەوەكەدا، كە ئاراس حەبیب كەریم، پەرلەمانتاری عێراق تێیدا ئامادە بوو، سەرۆكی حكومەت ئامادەیی هەرێمی كوردستانی بۆ هەر هاوكاریی و هەماهەنگییەك لەگەڵ پارێزگای بەسرە و پارێزگاكانی دیكەی عێراق دەربڕیوە.
