پەرلەمانتارێكی پارتی: هێزەكانی توركیا سەرقاڵی بڕینەوەی دارەكانی زاخۆن

ئەندامێكی فراكسیۆنی پارتی لەپەرلەمانی كوردستان رایگەیاند، هێزەكانی توركیا لەناوچەكانی سنوری قەزای زاخۆ سەرقاڵی بڕینەوەی دارەكانی ناوچەكەن كە تەمەنی هەندێكیان زیاتر لە 100 ساڵە، بۆیە داوا دەكات حكومەتی هەرێم  لەرێگەی یاسایی و دیپلۆماسییەوە كار بكات بۆ ئەوەی بڕینەوەی دارەكان لەلایەن توركیا رابگیرێت.
هێڤیدار ئەحمەد، ئەندامی فراكسیۆنی پارتی لەپەرلەمانی كوردستان لەپەیجی خۆی لەفەیسبوك ئاماژەی بەوەشكردوە، لەچەند ناوچەیەكی سنوری قەزای زاخۆ “چەتەكانی توركیا” دەستیانكردوە بە بڕینەوەی داری گوندەكانی (سنات، مێرگە شیش، شیش و كەلۆك، ماسیس) و چەندین گوندی دیكەی سنورەكە كە تەمەنی هەندێكیان زیاتر لە 100 ساڵە.
نوسیویشیەتی، داوا لە حكومەتی ھەرێمی كوردستان دەكەن، رێگای دبلۆماسی و یاسایی بگرنە بەر و داواش لە كۆمەڵگای نێودەوڵەتی دەكەن ئەم داربڕینە بوەستێنن.