بۆ یەكەمجار لە عێراق كەڕووی رەش دەركەوت

بەڕێوەبەرایەتی تەندروستی پارێزگای زیقار ئاشكرایكرد، لە شاری ناسریە توشبوویەك بە “كەڕووی رەش” تۆمار كراوە، ئەوەش یەكەمجارە توشبووی ئەو نەخۆشیە لە عێراق تۆمار بكرێت دوای ئەوەی لە وڵاتی هینستان سەریهەڵدا.
سەدام تەویل بەڕێوەبەری گشتی تەندروستی زیقار لە لێدوانێكی رۆژنامەوانیدا ئاماژەی بەوەداوە، لە شاری ناسریە توشبوویەكی نەخۆشی “كەڕووی رەش” تۆمار كراوە، ئەویش كەسێك بووە كە گیانی لەدەستداوە.
رونیشیكردووەتەوە، نەخۆشیەكە كاتێك ئاشكرا كراوە، كە ناسنامەی گیان لەدەستدان بۆ كەسێك كراوە و دەركەوتووە تووشی كەڕووی رەش بووە.
كەڕووی رەش پەتایەكی زۆر دەگمەنە و لەو كەسانەدا دەركەوێت كە سیستمی بەرگرییان نامێنێت و بەهۆی پیسی و خۆڵەوە دەگوازرێتەوە، لەماوەی رابردوودا لەناو توشبووانی كۆرۆنا لە وڵاتی هندستان دەركەوت و تائێستاش هەزاران حاڵەت تۆمار كراون.