رێواز فایەق سەرۆكی پەرلەمانی كوردستان دەڵێت، ماوەی هەفتەیەكیان داوە بە حكومەت بۆ ئامادەبوون لە پەرلەمان بۆ گفتوگۆكردن لەسەر كەمی دابینكردنی پارە بۆ موچەی فەرمانبەران و جەختلەوەشدەكاتەوە، چیتر لەوە زیاتر ناتوانێت ببێت بە داپۆشەری ئەو ناشرینیانەی لە هەرێم بەڕێوەدەچێت .
رێواز فایەق لە كۆنگرەیەكی رۆژنامەوانیدا ئاماژەی بەوەدا، كۆبونەوەی پەرلەمان لەسەر موچە بە ئامادەبوونی حكومەت باشترە، جارێك زیاتر داوامان لە حكومەت كردووە ئامادە بێت بەڵام وەڵامێكی ئیجابیمان وەرنەگرتووە، ژمارەیەك پەرلەمانتار داوایەكیان پێشكەش كردووە كە ئەگەر بەبێ ئامادەبوونی حكومەتیش بێت دانیشتن لەو بارەیەوە بكرێت.
وتیشی، بەڵام ژمارەیەك پەرلەمانتاری تر داوای ئامادەبوونی حكومەتیان كردووە و دەیانەوێت سەبارەت بە هۆكاری كورتهێنانی دابینكردنی پارە بۆ موچە كۆبوونەوە بكرێت، ئێمەش ماوەی هەفتەیەكمان داوە بە حكومەت بۆ ئامادەبوون لە كۆبونەوەكە تا هۆكارەكانمان پێ بڵێت و لەسەر ئەو بابەتە قسە بكەین.
رێواز فایەق جەختیلەوەشكردووەتەوە، پێمباشە كۆبونەوەی پەرلەمانتار بەرهەمدار بێت و تەنها بۆ نمایشكردنی هەندێك بیرۆكە نەبێت، هەموومان پێمان ناخۆشە موچە بەو شێوەیە و من وەك سەرۆكی پەرلەمان تاكەی ببم بە قوربانی، گوایە ئەوە سەرۆكی پەرلەمانە رێگە نادات لەو بارەیەوە قسە بكات.
سەرۆكی پەرلەمان دەشڵێت، من نە بەشێكم لە گرێبەستە نەوتییەكان و نە بەشێكم لە بەهەدەردانی سامانی هەرێم و نە بەشێكم لەوەی داهاتی نەوت نیوەی زیاتری بۆ كۆمپانیاكانی نەوتی ناوخۆیی و دەرەكی دەڕوات، نە بەشێكیشم لە داگیركردنی زەوی و نە بەشێكم لە قاچاخچێتی و بەهەدەردانی ماڵی گشتی، بەڵام فۆكسێكی راگەیاندنی خراپ خراوەتەر سەر من بۆ ئەوەی ئەوانی تر بشاردرێتەوە، چیتر لەوە زیاتر ناتوانم ببم بە داپۆشەری ئەو ناشرینیانەی لە هەرێم بەڕێوەدەچێت، لە رابردوو لە ئایندەشدا بەشێك نیم لەو ناشرینیانە.
