میللەت عیسمەت سكرتێری رۆژنامەوانی پارێزگاری دهۆك ئاشكرایكرد، پارێزگاری دهۆك هەماهەنگی لەگەڵ لایەنی توركییدا كردووە بۆ كۆنترۆڵكردنی بڕینەوەی داری سنورەكە.
میللەت عیسمەت سكرتێری رۆژنامەوانیی پارێزگاری دهۆك لە راگەیەندراوێكدا ئاماژەی بەوەداوە، لەگەڵ هەوڵە بەردەوامەكانی حكومەتی هەرێم كە چەند رۆژێكە بەردەوامە، عەلی تەتەر پارێزگاری دهۆك لەگەڵ كونسوڵگەری گشتی توركیا و والی شەڕناخدا بەداواداچوونی بۆ بابەتی بڕینەوەی دار و درەختیان لە سنووری پارێزگای دهۆك كردوە، دوای دانوستاندن بڕیار درا هەماهەنگی لە نێوان هەردوولادا بكرێ بۆ كۆنتڕۆڵكردنی ئەو بابەتە.
ئاماژەی بەوەشداوە، شەوی رابردوو قائیمقامی زاخۆ لەگەڵ قائیمقامی شەڕناخدا پەیوەندیی كردووە بۆ نەهێشتنی بڕینەوەی دارەكان لە سنوری زاخۆ و هەردوولا ئەوەیان دووپات كردووەتەوە كە ئەو كارە زیادەڕەوییە و قبوڵ ناكرێت.
سكرتێری رۆژنامەوانیی پارێزگاری دهۆك وتیشی، داوا لە هاووڵاتیان دەكەین لە هەر دەڤەرێك داری لێ دەبڕێتەوە دامودەزگاكانی حكومەتی بە بەڵگە لێ ئاگادار بكەنەوە، بۆ ئەوەی بەدواداچونی بۆ بكرێت و رێ لە زیادەڕەوی بگیردرێت.
