كۆسرەت رەسوڵ: یەكێتی بە هەموو لایەكی وت تا كوردێك مابێت خەبات بەردەوامە

پەیامی كۆسرەت رەسوڵ عەلی لە (46)ەمین ساڵیادی دامەزراندنی یەكێتیی نیشتمانیی كوردستان

بەناوی خوای گەورە و میهرەبان
جەماوەری خۆڕاگری كوردستان
ئەندام و دۆست و لایەنگرانی یەكێتیی نیشتمانیی كوردستان

لە چل وشەشەمین ساڵیادی دامەزراندنی یەكێتیی نیشتمانیی كوردستان، گەرمترین پیرۆزبایی خۆمتان ئاراستە دەكەم و هیواخوازم ئەم یادە پیرۆزە ببێتە هەوێنی تەبایی و یەكڕیزیی نێوان لایەنە سیاسییەكان و هەوڵدان بۆ كۆتاییهێنان بە قەیران و تەنگژەكان، بەتایبەتی كە هێشتا ناوچەكە لەژێر مەترسیدایە و تیرۆریستان مەترسییەكانیان بەردەوامە.

ئەمڕۆ چلوشەشەمین ساڵیادی دامەزراندنی یەكێتیی نیشتمانیی كوردستانە، ئەو یەكێتییەی لەدوای نسكۆی شۆڕش و بێئومێدیی گەلەكەمان، دامەزرا و لە شاخە سەركەشەكانی كوردستان دەستی بە خەبات كردەوە، بێئومێدیی گەلەكەمانی گۆڕی بۆ بەرگریكردن و رزگاركردنی كوردستان لە دڕندەترین رژێمی فاشیست و دیكتاتۆر، بە هەموو لایەكی وت تا كوردێك مابێت خەبات بەردەوامە و پێشمەرگە قارەمانەكان و تێكۆشەرانی گەلەكەمان بەرگریی دەكەن و بست بە بستی ئەم خاكە دەپارێزن.

یەكێتیی نیشتمانیی كوردستان و پێشمەرگە قارەمانەكانی، تەنها شۆڕشیان هەڵنەگیرساندەوە، بەڵكو خەباتیان كرد و قوربانیان دا تا لە ساڵی 1991 رابەرایەتیی راپەڕینمان كرد و كوردستانمان لە بەعسی فاشیست پاككردەوە، یەكەم هەڵبژاردن لە كوردستان ئەنجامدرا و كورد بووە خاوەنی حوكمڕانی هەڵبژێردراوی خۆی، بەردەوام بووین تا رووخانی رژێمی بەعس و ئازادكردنی عیراق لە حوكمی دیكتاتۆری و هەوڵدان بۆ بنیاتنانی عیراقێكی فیدرالی دیموكراسی، هەموو ئەوانە یەكێتی؛ رابەر و پێشەنگی بوو.

كوردستانیانی خۆشەویست…

ئەمڕۆی كوردستان بەرهەمی خەبات و قوربانیدانی تێكۆشەران و شەهیدە قارەمانەكانمانە، ئەو كەڵەپیاو و جوامێرانەی؛ ژیان و گیانی خۆیان كردە قوربانی گەلەكەمان، بۆیە ئەركە لەسەرشانی هەموومان یەكێتی بپارێزین و رێگەنەدەین لە شاڕێگای خۆی لابدات، دەبێت یەكێتی پێشەنگی خزمەتكردنی خەڵك و داكۆكیكردن لە دیموكراسی و ئازادی و مافی مرۆڤ بێت، یەكێتی لەپێناوی بەرەنگاربوونەوەی چەوسانەوە دامەزرا و خەباتی كرد بۆ زامنكردنی ژیانێكی شەرەفمەندانە بۆ گەلەكەمان، ئەمڕۆ و بەیانیش دەبێت هەر لەم پێناوەدا خەبات بكات و پێشەنگی دیموكراسی و چاكسازیی بێت و نەبێتە بەشێك لە هەوڵدان بۆ بەرتەسككردنەوەی ئازادیی رادەربڕین و چەوساندنەوەی خەڵك و حوكمڕانییەكی ناتەندروست و ناسەقامگیر.

جارێكی تر پیرۆزبایی ساڵیادی دامەزراندنی یەكێتی لە كەسوكاری سەربەرزی شەهیدان و پێشمەرگە قارەمانەكان و زیندانیانی سیاسی و كەمئەندامانی سەنگەر و تەواوی كوردستانیان دەكەم.

كۆسرەت رەسوڵ عەلی
سەرۆكی ئەنجومەنی باڵای سیاسی و بەرژەوەندیی
یەكێتیی نیشتمانیی كوردستان

هەواڵی دواتر

بایدن بڕیاری پێدانی 40 ملیار دۆلاری بە ئۆکراینا واژۆ کرد

سەرۆکی ئەمریکا، جۆ بایدن کە لە ئێستادا بە گەشتێک لە وڵاتانی ئاسیایە، پاکێجێکی هاوکاری ٤٠ …

وەڵامێک بنووسە

پۆستی ئەلکترۆنیکەت بڵاو ناکرێتەوە .