wazho.net
قائیمقامیەتی سلێمانی ئاشكرایكرد، دەست بەسەر 3 تۆن و 450 كیلۆ توتنی بەسەرچووی نێرگەلەدا گیراوە و خاوەنەكەی ویستوویەتی بە كافتریاكانی سلێمانی بفرۆشێت.
لەشكر حەمید سەرۆكی لیژنەی هاوبەشەكانی قائمقامییەتی سلێمانی لە راگەیەندراوێكی قائیمقامیەتدا وتویەتی، لە درێژەی هەڵمەتی گەڕان و بەدواداچونەكانی لیژنە هاوبەشەكانی قائیمقامیەت بۆ دوكان و بازاڕ و شوێنەگشتییەكان و پشكنینی ئەو كاڵاو شمەك و خواردەمەنییانەی رۆژانە لەلایەن بازرگانەكانەوە بە هاوڵاتیان دەفرۆشرێت، لیژنەی كۆگاكان لە گەڕەكی راپەڕینی شاری سلێمانی لە كۆگایەكدا دەستی بەسەر بڕی سێ تۆن و 450 كگم توتن “معسل”ی بەسەرچووی نێرگەلەدا گرت.
رونیشیكردووەتەوە، خاوەنەكەی بەنیاز بووە بە كافتریاكانی شاری سلێمانی بفرۆشێت و ساغی بكاتەوە، كێشانی نێرگەلە لە رووی تەندروستییەوە زیانی چەند هێندەی جگەرەیە، ئەگەر بێت و پێداویستییەكانی بەسەرچوبن یاخود خراپبوبن ئەوا زیانەكەی چەند بەرامبەرە.
لەشكر حەمید ئاماژەی بەوەشداوە، دوا بە دوای دەستبەسەرداگرتنی ئەو توتنە بەسەرچووە، بە فەرمانی قائیمقامی سلێمانی لەلایەن لیژنەی لەناوبردنەوە لەناو براوە و خاوەنەكەشی روبەڕوی رێكاری یاسایی توند دەكرێتەوە.
