بریكاری پێشووی وەزارەتی دارایی حكوومەتی عێراق ئاشكرای كرد، شاندی حكوومەتی هەرێمی كوردستان و حكوومەتی عێراق لەسەر سێ خاڵ رێككەوتوون. دەشڵێ، بەغدا قەرزی هەرێم دەداتەوە و هەرێمیش بە نرخی سۆمۆ پارەی نەوت دەداتە حكوومەتی عێراق و هەروەها هەردوو چاودێریی دارایی هەرێم و بەغداش، وردبینی لە داهات و نەوتی هەرێم دەكەن.
فازڵ نەبی، بە میدیای فەرمی پارتی وتووە، چوونی شاندی هەرێمی كوردستان بۆ بەغدا، گرنگ بوو و لە گفتوگۆكردن لەگەڵ بەغدا لەسەر سێ خاڵ رێككەوتوون، كە ئەوانیش بریتین لەوەی، هەردوو دیوانی چاودێریی دارایی عێراق و هەرێم وردبینی لە داهاتی خاڵە سنوورییەكانی هەرێم دەكەن، بەڵام ڕەنگە ئەمە هەندێك كاتی پێویست بێت بۆ ئەوەی بزانن داهاتی خاڵە سنوورییەكان چەندە، چونكە بڕیارە نیوەی بدرێت بە بەغدا بەپێی رێككەوتنی بودجە.
فازڵ نەبی وتیشی، جگە لەوەش، خاڵێكی دیكە ئەوەیە كە حكوومەتی هەرێمی كوردستان بە نرخی سۆمۆ نەوت دەفرۆشێت و داهاتی نەوتەكەش رادەستی بەغدا دەكات، ئێستاش نەوت گران بووە و بە هۆی دانپێدانان بە نەوتەكەشی، نرخی نەوتی هەرێم بەرز بووەتەوە، بۆیە ئەمە وا دەكات داهات زیاتر بێت و هەرێمیش بایی 250 هەزار بەرمیل داهات دەداتە بەغدا.
ناوبراو باسی لەوەش كرد، یەكێك لە خاڵەكانی دیكە ئەوەیە، حكوومەتی عێراق قەرزی (پی دی ئای) دەداتەوە، كە 3 ملیار دینارە و كاتی خۆی حكوومەتی هەرێم بۆ مووچە بەكاری هێناوە، كە بانكێكی بازرگانیی عێراقە و وەختی خۆی پارەكە لە لقی بانكی ناوەندی لە هەرێم بووە و ئەو بانكەش داوای دەكاتەوە، بۆیە حكوومەتی عێراق ئەو ئەركەی لەئەستۆ گرتووە، هەر لەبەر ئەوە لە ئێستادا لەسەر میكانیزمی رێككەوتنەكە، رێككەوتوون و دەست بە جێبەجێكردنی دەكرێت.
