دادوەرێكی داواكاری گشتی داوا لەسەرۆكی داواكاری گشتیی هەرێمی كوردستان دەكات، لەسەر نەگەڕانەوەی داهات و دواكەوتنی مووچەی فەرمانبەران لیژنەیەكی لێكۆڵینەوە پێكبهێندرێت.
محەمەد عەلی رێكانی، ئەندامی داواكاری گشتی لەیاداشتێكدا كە ئاراستەی سەرۆكی داواكاری گشتیی هەرێمی كردوە رایگەیاندوە: “داوا دەكەم وەك بە پێی ماددەی 1 برگەی یەكەم لە یاسای داواكاری گشتی ژمارە 159ی ساڵی 1979 كە پاراستنی سامانی گشتی هەرێمی كوردستانە، ماددەی 2 برگەی یەكەم كە تۆماركردنی سكاڵای گشتییە كاتێك مافی گشتی پێشێل دەكرێت، هەروەها بەپێی ئەوەی كە داواكاری گشتی نوێنەرایەتی كۆمەڵگا و مافی گشتی دەكات، لیژنەیەك لە سێ داواكاری گشتی پێكبهێنرێت بۆبەدواداچونی هۆكاری دواكەوتنی مووچەی فەرمانبەرانی كوردستان، كە سەرەڕای ئەوەی 21% مووچە دەبڕدرێت لە كاتی خۆشی نادرێت”.
راشیگەیاندوە، “لەماوەی رابردودا و لە دانیشتنی رۆژی 25ی ئایاری 2021ی پەرلەمانی كوردستان، ژمارەیەك ئەندام پەرلەمان بەئاشكراو لەڕێی كەناڵەكانی راگەیاندنەوە باسیان لەهۆكارەكانی دواكەوتنی مووچەی فەرمانبەران كرد، “هەندێكیان باسیان لە نەگەڕاندنەوەی داهاتە سنوریەكان و داهاتی نەوتی كوردستان كرد، لەلایەن هەندێك دامودەزگای حكومەت و هەندێك لایەنی سیاسی كوردستانیەوە”.
ئەو ئەندامەی داواكاری گشتی باسی لەوەشكردوە، “ئاشكرایە ئەم كارە دەرچوونە لە یاساو پێشێلكردن و بەهەدەردانی سامانی گشتی و خواردنی مافی یاسای فەرمانبەرانی كوردستان، بۆیە داوا دەكەم بڕیاربدەن ئەو لیژنەیە پێكبهێنرێت، سەردانی راستەوخۆی وەزارەتی دارایی و ئابوری، لایەنە پەیوەندیدارەكان بكات، بۆ ئاگاداربون لە راستیەكان، ئەو لایەن و دەزگاو بەرپرسانەی تۆمەتبارن بەمكارە، سكاڵای یاسایان لەسەر تۆمار بكرێت، بدرێنە دادگا و یاسا سەروەر بكرێت”.
