wazho.net
جێگری سەرۆك وەزیرانی هەرێم رایگەیاند: لەگەڵ بەغدا هەنگاوی باشمان ناوە بۆ جێبەجێكردنی یاسای بودجەی 2021 و لەماوەیەكی كەمدا هیچ بەربەستێك نامێنێت بۆ ئەوەی بەغدا بودجە و پشكی هەرێم نەنێرێت.
قوباد تاڵەبانی جێگری سەرۆك وەزیرانی هەرێم لەكۆیە پرۆژەیەكی كارەبای كردەوەو لە وتەیەكیشدا باسی لەوەكرد: كارەبا خزمەتگوزارییەكی سەرەتاییەو ئەركی حكومەت دابینی بكات، سەرەڕای ئەو پرۆژانەی لەبواری كارەبادا كراون، بەڵام هێشتا لەئاستی چاوەڕوانی خەڵكی كوردستان و ئێمەدا نیە، بۆ نەهێشتی كێشەی كارەبا پێویستمان بەهەماهەنگی هەیە لەنێوان حكومەت و هاووڵاتیان و كەرتی تایبەت.
لەبەشێكی دیكەی قسەكانیدا قوباد تاڵەبانی ئاماژەی بە سەردانەكەی ئەمدواییەی بۆ بەغدا كرد و وتی: ئەو سەردانە بۆ چارەسەری چەند كێشەیەك بووە، یەكێكیش لەكێشەكان كارەبایەو عیراقیش كێشەی هەیەو دەتوانین هەماهەنگ بین بۆ ئەوەی ئەوان سوتەمەنی دابین بكەن و بەشێك لەكێشەی كارەبای ئەوان چارەسەر بكەین و كێشەی خۆشمان چارەسەر ببێت.
هەر لە بارەی ئەو سەردانەوە جێگری سەرۆك وەزیرانی هەرێم وتی:هەنگاوی باشمان ناوەو لەگەڵ سەرۆك وەزیران و وەزیرانی دارایی و نەوت و لایەنە پەیوەندیدارەكانی تر كۆبووینەتەوەو تونراوە هەنگاوی باش بۆ جێبەجێكردنی یاسای بودجەی 2021 بنرێت و لەماوەیەكی كەمدا هیچ بەربەستێك نامێنێت بۆ ئەوەی بەغدا بودجەو پشكی هەرێم نەنێرێت.
قوباد تاڵەبانی راشیگەیاند: وەك هەرێم پابەند دەبین بایاسای بودجەو هیچ بیانویەك ناهێڵێن بۆ ئەوەی چیتر بەغدا پشكی هەرێم نەنێرێت و مافی خەڵكی هەرێم وەربگیرێت، چونكە ئێمە تەواو پابەند دەبین.
