هەپەگە: تائێستا هۆكاری تەقینەوەی زریپۆشەكەی پێشمەرگە دیار نییە

باڵی سەربازی پەكەكە باس لەوەدەكات، لە مەتینا بۆ رێگری لە پێشڕەوی هێزەكانی پارتی تەنها تەقەیان بە ئاسماندا كردووە، ئەوەش دەخاتەڕوو، كە تائێستا هۆكاری تەقینەوەی زریپۆشێكی هێزەكانی پێشمەرگە نازانن.
هێزی پاراستنی گەل هەپەگە كە بە باڵی سەربازی پەكەكە ناسراوە رایگەیاندوە: هێزێكی پارتی بەنیازبوون لە مەتینا جێگیربن، بۆیە هێزەكانی گەریلا بە چەكی قورس تەقەیان بە ئاسماندا كردووە بۆ ئەوەی هۆشدار بدەن لەو پێشڕەوییە.
راشیگەیاندووە، زریپۆشێكی هێزەكانی پێشمەرگە بە بێ گوێدان بە هۆشدارییەكان بەردەوام بووە لە پێشڕەوی، بەڵام تائێستا دیار نییە كە ئەو زریپۆشە مین پێیدا تەقیوەتەوە یان لە لایەن سوپای توركیاوە بۆردومان كراوە.
پێشتریش هەپەگە رایگەیاندبوو: هێزێكی عێراقی و پێشمەرگەكانی سەر بە پارتی بە نیازبوون بەرەو ناوچەكانی ژێر كۆنتڕۆڵی گەریلا لە مەتینا جوڵە بكەن، بەڵام بۆ راگرتنی پێشڕەویەكانیان گولەی هۆشیاركردنەوەیان تەقاندووە.
راشیگەیاندبوو: “ئێمە لە بەرامبەر دەوڵەتی تورك كە بە نیازە كوردستان داگیر بكات بەرخۆدان دەكەین، داوا لەو هێزانە دەكەین كە لە پشتەوە خەنجەرمان لێنەدەن و خوێنی خۆشك و برا نەڕیژن، بۆیەش داواكەمان ئاڕاستەی گەل و هێزەكان دەكەین”.
ئەمەش لە كاتێكدایە پێشتر وەزارەتی پێشمەرگە رایگەیاندبوو، لە بۆسەیەكی گەریلاكانی پەكەكە لە مەتینا پێنج پێشمەرگە شەهیدبوون و دووانی دیكەش برینداربوون.
لای خۆشیەوە دلێر زێباری، بەرپرسی لیوای یەكی پاسەوانیی سنوور رایگەیاندووە: هیچ هێزێكی عێراقی لە مەتینا نییە و لەو شەڕەشدا بەشدارنەبوون.