سەرۆكایەتی كۆماری عێراق نیگەرانی خۆی لە هێرشەكەی سەر هێزەكانی پێشمەرگە لە سنوری قەزای ئامێدی نیشاندا و بوونی هێزی چەكداری پەكەكەشی لە هەرێم بە نایاسایی ناوبردووە و هاوكات بە پێویستی دەزانێت توركیاش هێزەكانی لە ناوچەكانی هەرێم و موسڵ بكشێنێتەوە.
وتەبێژی سەرۆكایەتی كۆماری عێراق لەراگەیەنراوێكدا بڵاویكردەوە، “بەنیگەرانیەوە چاودێری پێشهاتە نەخوازراوەكانی هەرێمی كوردستان دەكات و سەركۆنەی ئەو هێرشانە دەكات، كە ڕۆژی شەممە 5ی حوزیران، كرانە سەر ھێزەكانی پێشمەرگە، لەناوچەی ئامێدی پارێزگای دھۆك و لەئاكامدا چەند شەھید و بریندارێكی ھێزەكانی پێشمەرگەی لێكەوتەوە”.
وتەبێژی سەرۆكایەتی كۆمار، جەخت دەكاتەوە كە پێویستە ئەو ڕوداوە ئازاربەخشانە بەكۆتابێن، بونی هێزی چەكداری پارتی كرێكارانی كوردستان لەناو خاكی عێراق و هەرێمی كوردستان نایاساییە و پێویستە سنورێك بۆ ئەو دەسدرێژیانە دابنرێت كە مەترسی بۆ ئەمنی هاوڵاتیان و ئاسایشی عێراق دروست دەكەن، دەستور ڕێگەنادات خاكی عێراق ببێتە سەرچاوەی هەڕەشە بۆسەر دراوسێكان.
وتەبێژی سەرۆكایەتی كۆمار، پێداگری دەكات لەسەر، بنەبڕكردنی هەموو ئەو زیادەڕۆییانەی پێشێلی سەروەری عێراق دەكەن، لەم ڕوەوە كشانەوەی هێزەكانی توركیا لە ناوچەكانی هەرێمی كوردستان و موسڵ بە پێویست دەزانێت، چونكە بونی ئەو هێزانە پێچەوانەی هاوسێیەتی باش و ڕێكەوتنامە نێودەوڵەتیەكانیشە، هەروەها هێرشكردنە سەر ناوچەكانی كامپی مەخمور مەترسیدارە و ناكۆكیشە لەگەڵ یاسا نێودەوڵەتی و مرۆییەكان.
