یەكەم وڵات دەیەوێت بە فەرمی دراوی ئەلكترۆنی بەكاربهێنێت

سەرۆكی وڵاتی سەلڤادۆر رایگەیاند، هەفتەی داهاتوو پڕۆژەی بەفەرمی ناساندنی مامەڵە بە دراوە ئەلكترۆنیەكان رەوانەی پەرلەمانی وڵاتەكەی دەكات.
نەجیب بوكیلە سەرۆكی سەلڤادۆر لە میانی كۆبوونەوەیەكی تایبەت بە دراوە ئەلكترۆنیەكان لە فلۆریدای ئەمریكا رایگەیاند، وڵاتەكەی دەبێتە یەكەم وڵاتی جیهان لە جیهان كە مامەڵە كردن بە دراوە ئەلكترۆنیەكان بە فەرمی دەناسێنێت.
راشیگەیاندووە، بەكارهێنانی بیتكۆین و دراوە ئەلكترۆنیەكانی دیكە هەلی كار و بوژانەوەی ئابوری بۆ سەلڤادۆر دەڕەخسێنێت و ئەو هاوڵاتیانەشی لە دەرەوەی كار دەكەن بە ئاسانی دەتوانن بە دراوی ئەلكترۆنی پارە بۆ كەسوكاریان لە ناوخۆ بگوازنەوە.
هەفتەی داهاتوو پڕۆژەی بە فەرمی ناسینی دراوە ئەلكترۆنیەكان لە مامەڵەی رۆژانە رەوانەی پەرلەمانی سەلڤادۆر دەكرێت و لە ئەگەری پەسەندكردنی ئەو پڕۆژەیە، لە پاڵ دراوی نیشتمانی و دۆلاری ئەمریكی دراوە ئەلكترۆنیەكان دەبنە سێهەم دراوی كارپێكراو لەو وڵاتە.