عێراق داوای كردووە ئێران سێ هێندەی ئێستا گازی بۆ هەناردە بكات

وتەبێژی وەزارەتی كارەبای عێراق رایگەیاند: هەرچەندە لەئیستادا رۆژانە 17 هەزار مێگاوات كارەبا بەرهەمدەهێنن، بەڵام بۆ زیادكردنی بەرهەمهێنانی كارەبا چاوەڕێی رەزامەندی ئێرانن لەسەر داواكارییەكی بەغدا بۆ زیادكردنی هەناردەكردنی گاز.
ئەحمەد عەبادی، وتەبێژی وەزارەتی كارەبای عێراق لەلێدوانێكدا رایگەیاندووە، لەئێستادا رۆژانە 17 هەزار مێگاوات كارەبا بەرهەمدەهێنن و وەزارەتەكەیان پلانی ئەوەی هەیە رێژەكەی بۆ 22 هەزار مێگاوات بەرزبكاتەوە.
ئاماژەی بەوەشكردوە، لەئێستادا وڵاتی ئێران رۆژانە 20 ملیۆن مەتر سێجا گاز بۆ عێراق هەناردە دەكات، بەڵام بەغدا داوای بەرزكردنەوەی رێژەكەی بۆ سێ بەرامبەر كردووە بۆ ئەوەی بتوانرێت كاتژمێرەكانی پێدانی كارەبای نیشتیمانی بەرزبكرێتەوە.
عێراق جگە لەوەی كارەبا لە ئێرانەوە دەكڕێت، بۆ مەبەستی دابینكردنی سوتەمەنیش بۆ وێستگەكانی بەرهەمهێنانی كارەبا پشتی بە هاوردەكردنی گاز لەو وڵاتە بەستووە.