wazho.net
هێزی پاراستنی گەل (هەپەگە) رایگەیاند: “ئەو ئۆتۆمبێلەی لە چیای مەتینا تێكشكێنرا لە لایەن گەریلاوە نەكراوەتە ئامانج”، داواشدەكات لیژنەیەكی سەربەخۆ لێكۆڵینەوە لەو رووداوە بكات.
هەپەگە لە راگەیەنراوێكدا سەبارەت بە رووداوەكەی رۆژی شەممە مەتینا و تەقینەوەی ئۆتۆمبێلێكی زێرەڤانی كە بووە هۆی شەهیدبوونی پێنج پێشمەرگە باسی لەوەكردووە: “ڕۆژی 5ی حوزەیران لە كاتژمێرەكانی بەرەبەیانیدا هێزە سەربازییەكانی پارتی بەبێ هیچ زانیارییەك و بەشێوازی ئۆپەراسیۆن ویستیان بچنە ناوچەی گەریلا لە مەتینا ئەمە بێگومان هەڵەیە و خزمەت بە بەرژەوەندی نەتەوەیی ناكات”.
راشیگەیاندوە: “ڕاستە هێزەكانمان لەوێ چەند فیشەكێكیان بۆ ئاگاداركردنەوە تەقاند، بەڵام بەدڵنیایەوە ئەو چەكەی كە بووە هۆی تێكشكاندنی ئەو ئۆتۆمبێلە لەلایەن هێزەكانمانەوە بەكارنەهاتووە، بۆیه ئەو ئۆتۆمبێله له ڕێگای هەوا و موشەكەوە لێیدرا”.
لەكۆتاییشدا هەپەگە رایگەیاندوە: “بۆیە بۆ پرسی تەقاندنەوەی ئۆتۆمبێلەكە ئێمە وەك هەپەگە ڕایدەگەیەنین كە پێویستە شاندێكی هاوبەش یان شاندێكی سەربەخۆ لێكۆڵینەوە لەو ڕووداوە بكەن و ڕوونكردنەوەی لەسەر بدەن”.
