وەزیری پەروەردە: بڕیاری پێویست بۆ قەرەبووكردنەوەی خوێندنی بنەڕەتی دەدرێت

ئالان حەمە سەعید وەزیری پەروەردەی حكومەتی هەرێمی كوردستان دەڵێت، لە كۆبوونەوەی ئەنجومەنی وەزارەت كە لەم مانگەدا بەڕێوە دەچێت، بڕیاری پێویست بۆ قەرەبووكردنەوەی خوێندنی بنەڕەتی دەدرێت.
ئالان حەمە سەعید بە ماڵپەڕی فەرمی پارتی راگەیاندووە، 19ی حوزەیران بە گوێرەی سیستمی تەناوب كۆتا رۆژی خوێندنی ناو پۆلە بۆ قۆناغی 1ی بنەڕەتی تا 11 ی ئامادەیی، لە 22 ی حوزەیران بۆ ئەو قۆناغانە تاقیكردنەوەی خولی یەكەمی كۆتایی ساڵ ئەنجام دەدرێت، هاوكات قۆناغی 12ی ئامادەیش لە 5ی حوزەیران تاقیكردنەوەی وەرزی دووەمیان دەستپێكردووە و پرۆسەكەش باش بەڕێوەدەچێت.
وتوشیەتی، لە كۆبوونەوەی ئەنجومەنی وەزارەت كە لەم مانگەدا بەڕێوە دەچێت پرسی قەرەبووكردنەوەی زانستی و پەروەردەیی قوتابیان یان پاڵپشتیكردنیان و بەهێزكردنی ئاستیان، بە تایبەت قۆناغی 1 و 2و3 ی بنەڕەتی گفتوگۆی لەبارەوە دەكرێت.
وەزیری پەروەردە جەختیلەوەشكردووەتەوە، وەزارەت چەند میكانیزمێكی لەبەردەستە كە لەو كۆبوونەوەیە بڕیاری سەرەتایی لە میكانیزمی گونجاو دەدرێت و پاشان بۆ دەوڵەمەندكردنیشی گفتوگۆ لەگەڵ بەڕێوەبەری پەروەردەی قەزاكان و بەڕێوەبەری سەرپەرشتیاریی پەروەردەیی دەكرێت و دواتر بریاری كۆتایی لەبارەوە دەدرێت بۆ جێبەجێكردن.