لە سنوری ناحیەی “دەركار”ی سەربە قەزای زاخۆ، پێشمەرگەیەك شەهید كراو بەپێی وتەی بەڕێوەبەری ناحیەكەش لەلایەن گەریلاكانی پەكەكەوە تەقەی لێكراوە.
تەلەفزیۆنی فەرمی پارتی بڵاویكردووەتەوە، بەرەبەیانی ئەمڕۆ لە ناحیەی دەركار گەریلاكانی پەكەكە تەقەیان لە هێزێكی پێشمەرگە كردووە و بەهۆیەوە پێشمەرگەیەك شەهید بووە.
لای خۆیەوە ئەدیب جەعفەر بەڕێوەبەرەی ناحیەی دەركار لە لێدوانێكی رۆژنامەوانیدا باسی لەوەكردووە، ئەو هێزەی پێشمەرگە لەگەڵ پاسەوانی سنوری عێراقدا بوون و چوون خاڵێكی ستراتیژی دابنێن تا توركیا زیاتر نەیەتە پێشەوە، بەڵام لەلایەن گەریلاكانی پەكەكەوە تەقەیان لێكراوە و یەكێك لە پێشمەرگەكان شەهید بووە.
لەلایەكی ترەوە عەمید دلێر زێباری بەرپرسی هێزەكانی پاراستنی سنووری عێراقیش دەڵێت، سەرچاوەی تەقەكردن لەو پێشمەرگەیە دیار نییە.
تائێستا وەزارەتی پێشمەرگە و پەكەكەش هیچ روونكردنەوەیەكیان لەو بارەیەوە بڵاونەكردووەتەوە، پێشتریش پەكەكە ئاماژەی بەوەدابوو، هێزەكانی پارتی خۆیان بۆ هێرشكردنە سەریان ئامادە دەكەن.
