ناوەرۆكی كۆبوونەوەی سەرۆكی هەرێم و وەزیری دەرەوەی بەریتانیا خرایەڕوو

دوای كۆبوونەوەی نێچیرڤان بارزانی سەرۆكی هەرێم و دۆمینیك راب، وەزیری دەرەوەی بەریتانیا، كۆنگرەیەكی رۆژنامەوانییان ئەنجامدا، وەزیری دەرەوەی بەریتانیا رایگەیاند، “سەردانەكەم بۆ درێژەدانە بە پەیوەندیمان لەگەڵ گەلی كورد، پەیوەندییەكی دێرینمان لەگەڵ گەلی كورد هەیە”.
 نێچیرڤان بارزانی، سەرۆكی هەرێمی كوردستان لە كۆنگرە رۆژنامەوانیدا رایگەیاند، “پەیوەندییەكانمان لەگەڵ بەریتانیا بەرزدەنرخێنین و سوپاسی پشتگیریی بەردەوامیان بۆ گەلی كوردستان دەكەین، هاوبەشی بەریتانیا 30 ساڵ پێش ئێستا دەستی پێكردووە كاتێك كە لە نیسانی 1991 لەگەڵ هاوپەیمانەكانیان بڕیاری 688ـیان دەركرد بۆ دروستكردنی ناوچەی ئارام”.
 سەرۆكی هەرێمی كوردستان لەبارەی رووبەڕووبوونەوەی داعش رایگەیاند، “هاوشانی بەریتانیا و هاوپەیمانەكانیان پابەندی خۆمان بە بەردەوامیی بەرەنگاربوونەوەی تیرۆر و مەترسی و هەڕەشەكانی داعش دووپات دەكەینەوە.” 
 وەزیری دەرەوەی بەریتانیا لەبارەی دۆخی هەرێمی كوردستان لە ململانێكانی ناوچەكە دەڵێت، “حكومەتی هەرێمی كوردستان توانیویەتی بەرگەی گوشارەكانی ئێران بگرێت، هەروەها بێگومان رۆڵی زۆر گرنگی هەبووە لە شەڕی دژی داعش، بۆیە من ستایشی رۆڵی پێشمەرگە و رۆڵی میللەتی كورد دەكەم كە زۆر قوربانیان داوە لەم پەیوەندییە ماوەدرێژە”.
 جەختیشیكردەوە، “بەریتانیا پابەند دەبێت لە پەیوەندییەكانمان لەگەڵ هەرێمی كوردستان لە بواری ئابووری و سەربازی”، هەروەها دەشڵێت، “لەگەڵ سەرۆكی هەرێمی كوردستان باسی گرنگیی میدیای ئازادمان كردووە، باسی سەربەخۆیی و پاراستنی ئازادیی رادەربڕینیشمان كردووە”.