داوا دەكرێت بەهۆی بەرزبونەوەی نرخەكانەوە قەرەبووی هاوڵاتیان بكرێتەوە

كۆمسیۆنی باڵای مافەكانی مرۆڤ لە عێراق جەختلەوەدەكاتەوە، بەهۆی بەرزبوونەوەی نرخی دۆلارەوە هاوڵاتیان زیانێكی زۆریان كردووە و نرخی كاڵاكان زۆر بەرز بوونەتەوە، داوا دەكەن لە بودجەی فریاگوزاری قەرەبوو بكرێنەوە.
فازڵ غەراوی ئەندامی كۆمسیۆنەكە لە بەیاننامەیەكدا بڵاویكردووەتەوە، چینە لاوازەكان و ئەوانەی داهاتیان دیاری كراوە زیانێكی زۆریان كردووە بەهۆی سیاسەتی حكومەت بۆ بەرزكردنەوەی نرخی دۆلار بەرامبەر دینار.
رونیشیكردووەتەوە، ئەو سیاسەتە بووەتە هۆی ئەوەی نرخی ئەو كاڵاكان زۆر بەرز ببنەوە، ئەوەش سەرەڕای ئەوەی كە هاوڵاتیان روبەڕووی چەندین قەیران بوونەتەوە بەشێوەیەكی رۆژانە، هەر لە نەبوونی خزمەتگوزاری و كارەبا و لایەنی تەندروستی و فێركردن و ژینگەیی تا نەبوونی هەلی كار و داهات.
غەراوی جەختیلەوەشكردووەتەوە، بەردەوامی بەرزبوونەوەی نرخ بووەتە هۆی ئەوەی هاوڵاتیان نەتوانن پێداویستیەكانیان دابین بكەن، بۆیە داوا دەكەن بەشێوەیەكی راستەوخۆ لە بودجەی فریاگوزاری قەرەبووی هاوڵاتیان بكرێتەوە.