سەرۆكی لیژنەی ناوچە كوردستانییەكان لە پەرلەمانی كوردستان دەڵێت، پارێزگاری سەپێندراوی كەركووك و عەرەبی هاوردە، كێشە و گرفتی زۆر بۆ كورد دروست دەكەن، بە جۆرێك وەكو سەردەمی بەعسیان لێ هاتووە، بۆیە دەمانەوێت لە رێگەی نوێنەری حكوومەتی هەرێم لە بەغدا و وەزیری هەرێم بۆ كاروباری بەغدا، كە بڕیارە دووشەممە بانگهێشتی پەرلەمانیان بكەین، كێشەكانیان بگەیەنین بە بەغدا، بۆ ئەوەی چارە بكرێن.
جوان رۆژبەیانی، پەرلەمانتاری پارتی و سەرۆكی لیژنەی ناوچە كوردستانییەكان لە پەرلەمانی كوردستان بە میدیا فەرمی حزبەكەی راشیگەیاندووە: دەمانەوێت ئەو كارە بكەین، تاوەكو دۆخی ئەو ناوچانە ئاسایی دەكرێتەوە، چونكە رێگری زۆر لە كورد دەكرێت و جیاوازییەكی زۆریش لە نێوان كورد و عەربەكاندا دەكرێت، هەم ئەوانەی لە پۆستدان و هەم خەڵكیش بە گشتی، چونكە مامەڵەیەكی زۆر خراپیان لەگەڵ دەكرێت و وایان لێ دەكرێت، كە ناچاریان بكەن شوێنی خۆیان جێبێڵن
ناوبراو باسی لەوەش كرد، خواستێك هەیە بۆ ئەوەی ئەو ناوچانە بە كورد چۆڵ بكرێت و عەرەبی هاوردە شوێنەكانیان پڕ بكەنەوە، ئەمەش لە كاتێكدایە كە ژمارەیەكی زۆری بەرپرسانی كورد لادراون و رێژەیەكی زۆر كەمیان ماون، ئەوانەی كە ماویشن، سەر بە هەرێمی كوردستانن و لە كەركووك دەوام دەكەن، سەرەڕای ئەوەش گرفتیان بۆ دروست دەكەن.
