رێكخراوی كۆچی نێودەوڵەتی سەربە نەتەوە یەكگرتووەكان رایگەیاند كە لە میانی 48 كاتژمێری رابردوودا، زیاتر لە هەزار كۆچبەری نایاسایی لە كەناراوەكانی لیبیا دەستگیركراون.
سەفا مشلی وتەبێژ لە رێكخراوی كۆچی نێودەوڵەتی، لە هەژماری خۆی لە تویتەر رایگەیاند “لە میانی دوو رۆژی رابردوودا، لەلایەن ئاسایشی كەناردەریای لیبیاوە رێگری لە زیاتر لە هەزار كۆچبەری نایاسایی كراوە”.
ئەو وتەبێژەی رێكخراوی كۆچی نێودەوڵەتی زانیاری زیاتری سەبارەت بە بابەتەكە نەخستەڕوو.
لە ماوەی ساڵانی رابردوودا، لیبیا بووەتە یەكێك لە گرنگترین خاڵەكانی پەڕینەوەی كۆچبەرانی ئەفریقا، كە لە دەست هەژاریی و شەڕو پێكدادانەكان، وڵاتەكانیان بەرەو ئەورووپا جێدەهێڵن.
