سەرۆكی پەرلەمانی كوردستان رایگەیاند، دانیشتنی داهاتووی پەرلەمان لەسەر بودجە و موچە دەبێت و باسی لەوەشكرد، ئەمساڵ ئەو دامەزراوەیە پشووی هاوینە وەرناگرن.
رێواز فایەق، سەرۆكی پەرلەمانی كوردستان لە لێدوانێكدا بە سایتی رووداوی راگەیاندوە، كۆبوونەوەی داهاتوویان لەبارەی پرسی بودجە و مووچەی مووچەخۆرانی هەرێمی كوردستان دەبێت.
لەبارەی پشووی هاوینەی پەرلەمانی كوردستان كە 1ـی تەمووزی هەموو ساڵێك دەستپێدەكات، رێواز فایەق رایگەیاند: ”ئەمساڵ پشوو نییە.”
سەرۆكی پەرلەمان هیچ ئاماژەیەكی بە وادەی دانیشتنی داهاتووی پەرلەمان نەكرد، بەڵام بە وتەی خۆی “هیچ كۆبوونەوەیەكی دیكە ناكرێت تاوەكو لەسەر پرسی مووچە و بودجە دانیشتن نەكەن و ئێستا ئامادەكاریی بۆ دانیشتنەكە دەكەن”.
